MARKAZIY BANKLAR TOMONIDAN AMALGA OSHIRILGAN MONETAR SIYOSAT CHORALARI SAMARADORLIGI (O‘ZBEKISTON VA QOZOG‘ISTON MISOLIDA)

Аннотация

Ushbu tezisda O‘zbekiston Respublikasi Markaziy banki hamda Qozog‘iston Respublikasi Milliy banki tomonidan amalga oshirilgan monetar siyosat choralari samaradorligi qiyosiy tahlil qilindi. Tadqiqotda inflyatsiya darajasi, siyosat stavkasi, pul massasining o‘zgarishi, kreditlash hajmi va valyuta kursi dinamikasi kabi asosiy makroiqtisodiy ko‘rsatkichlar 2020–2024-yillar kesimida ko‘rib chiqildi. Empirik natijalar shuni ko‘rsatdiki, O‘zbekistonda monetar siyosat inflyatsiyani pasaytirishda sezilarli ta’sir ko‘rsatgan bo‘lsa-da, yuqori dollarizatsiya va moliya bozorining chuqurlashmaganligi uzatilish kanallarini cheklab qo‘ymoqda. Qozog‘istonda esa inflyatsiya maqsadli rejimining joriy etilishi inflyatsion kutishlarni boshqarishga yordam bergan, biroq subsidiya asosidagi kredit dasturlari siyosat samaradorligini pasaytirgan. Mualliflar, monetar siyosat vositalarining iqtisodiy o‘sishga ta’siri fiskal siyosat bilan uyg‘unlashganda yanada kuchayishini, shuningdek, moliya bozorlarini rivojlantirish, dollarizatsiyani kamaytirish va Markaziy banklarning institutsional mustaqilligini ta’minlash orqali samaradorlikni oshirish mumkinligini ta’kidlaydilar.